Патописец: НИКОЛА ИЛИЕВ
Во периодот од 17.02-23.02.2025година,12 ученика од СОУ „Јосиф Јосифовски“ Гевгелија присуствуваа заедно со своите професори во посета на УЈ средно училиште Јабланица во збратимената Општина Јабланица, Босна и Херцеговина. Посетата беше остварена во рамките на вториот циклус на програмата Суперучилишта огранизирана од страна на Регионалната канцеларија за младинска соработка (RYCO), Европската унија,GIZ и Германската влада.
Нашата авантура започна со возбудливо патување кон Јабланица, мало, но историски богато место во Босна и Херцеговина. Овие пет дена беа исполнети со дружење, учење и истражување, а секој момент ни носеше ново искуство и спомени кои ќе ги носиме со нас засекогаш.
Ден 1: Запознавање и првите активности
Првиот ден беше посветен на запознавање со новите другар од Јабланица. Нивната гостопримливост веднаш ни покажа дека ќе биде една прекрасна средба. Нашето дружење започна со посета на нивното училиште, каде што заедно учествувавме во работилница за меѓусебна соработка и разбирање. По оваа активност, имавме чест да го посетиме градоначалникот на Јабланица, кој ни посака добредојде и ни раскажа повеќе за градот и неговата историја. Денот го завршивме со посета на локалната CNC работилница, каде што се запознавме со современите технологии за обработка на метал и дрво.
Ден 2: Симболика на мирот и истражување на Коњиц
Вториот ден го започнавме со инспиративна работилница, во која создадовме видео на тема „Како да градиме мир меѓу нас“. Како дел од активноста, со нашите раце го изработивме симболот за мир со пораката „Дај му шанса на мирот!“. Оваа креативна задача нè поттикна да размислуваме за важноста на разбирањето и толеранцијата.
Попладнето го поминавме во Коњиц, каде што имавме можност да го посетиме историскиот бункер на Тито – познат како Д-0, таен објект кој ни откри многу интересни детали за периодот на Југославија. Денот го завршивме со работилница за изработка на мирисни свеќи, заедно со учениците од фармацевтската струка, што беше прекрасно креативно искуство.
Ден 3: Хуманитарна мисија и тимски активности
Третиот ден беше посветен на хуманитарни активности. Го посетивме Црвениот крст во Јабланица и муслиманската донаторска организација Мерхамет. Таму ја добивме задачата да подготвиме пакети со основни прехранбени и хигиенски продукти, кои лично им ги доставивме на социјално загрозени семејства и стари луѓе. Овој момент беше емотивен и ни покажа колку е важно да се помага на оние на кои им е најпотребно.
Попладнето го поминавме во училишното игралиште, каде што се натпреварувавме во тимски игри. Имавме задача да составиме зборови поврзани со мирот, како и натпревар во влечење јаже, што донесе многу смеа и забава.
Ден 4: Симбол на мирот и историско патување
Четвртиот ден започна во училиштето, каде што изработивме хамери со симболи на мирот и засадивме „Дрво на мирот“, како потсетник за пријателството и сплотеноста што ги создадовме овие денови.
Потоа го посетивме Музејот на битката за ранетите на Неретва. Овој музеј и срушениот мост над реката Неретва ни оставија длабок впечаток, бидејќи ја раскажуваат приказната за храброста и историјата на овој крај.
Ден 5: Магијата на Мостар
Нашето патување го завршивме со посета на прекрасниот град Мостар. Го разгледавме познатиот Стар мост, кој е симбол на мирот и сплотеноста меѓу луѓето. Прошетавме низ старите улици, истражувавме локални знаменитости и уживавме во убавината на градот.
Овој ден го завршивме со забава заедно со нашите нови пријатели од Јабланица, каде што со музика и смеа ја заокруживме оваа незаборавна авантура.
Нашето патување во Јабланица беше многу повеќе од обична посета – беше искуство што нè збогати со нови знаења, пријателства и моменти што ќе ги паметиме засекогаш. Овие пет дена ни покажаа дека мирот се гради преку разбирање, соработка и заеднички напори, и дека вистинското богатство се луѓето што ги запознаваме по патот.
