Новинар: Виолета Чугунцалиева
Снежана Делимитова, е гевгеличанка позната по својата преселба во Дубаи, за да го оствари патот кон својата кариера, во подобри услови. Во ова интервју, ни раскажува подетално за нејзините животни одлуки и за самата себе.
Кажете ми нешто за вас, за својата личност
Вљубеник во уметноста во секоја форма, најмногу музиката. Уште од мали нозе афинитетите кон музиката, камерите, театарот и сцената беа очевидни, и тој жар трае до денешен ден. Додека бев ученичка, активно учествував во драмските секции, хорот, бев водител на многу манифестации во градот вклучувајќи го детскиот фестивал „Калинка“, водев забавни емисии на локалното радио Гевгелија и тогашните телевизии. Отсекогаш бев одлична ученичка, добра другарка со голема љубов и разбирање кон животот. Желна за нови предизвици и истражување посебно за различните култури и религии. Сакам да патувам, да се дружам и секогаш да гледам на позитивни страни од животот.
Како се одлучивте да ја започнете кариерата како DJ, и кои се предностите и недостатоците?
Овој одговор ќе го надоврзам со претходниот, целата моја позадина – таленти и искуство поврзани со музиката. Овде ќе го додадам и искуството и во радио Антена 5, кое ми помогна да научам многу работи што ми помагаат денес. Природно беше да продолжам со диџејството, и не би ја менувала оваа работа со ништо друго. Посебно овде во Дубаи, многу се популарни девојки диџејки, а јас сум во предност токму поради музиката и познавањето на техничкиот дел. Мојот сопруг, исто е диџеј и продуцент и многу ми помогна и ме подржуваше во оваа одлука.
Направете кратка споредба помеѓу животот таму и овде.
Споредбата е голема со поглед на тоа што живееме на различни континенти. Овде 90 % се експатријати и со самото тоа имаме микс на многу култури што живеат зеадно и почитуваат иста култура.. Секој е слободен да си ја практикува религијата и традиција, а сепак да биде во чекор со сето она што го нуди Дубаи. Луксуз, иновации, сензации и чуда. Секојдневно нешто ново се среќава, ова е центар на економијата, на бизниот, модата, на музиката исто така – секоја недела гостуваат најпозните диџеи и пејачи од целиот свет. Сè ви е достапно до врата 24/7. Тоа кај нас го нема. Нема партиски книшки, така што секој го добива тоа што го заслужува.
Како сте задоволна со успехот што го постигнавте со вашата кариера и начин на живот, дали добивте помош од некого за да стигнете до ова каде што сте денес?
Самиот факт што сум оставила сè во Макеонија и да останам овде толку време за мене е успех. Успех е и мојата прекрасна фамилија што сум ја створила, нашиот дом и кариерата. Мојот ангажман е доста голем, работам секој ден понекогаш без слободен ден. Во моето портфолио се најпознатите ресторани и барови каде што сум пуштала музика, фестивали и настани. Моментално сум ангажирана на три места во луксузниот Royal Atlantis Hotel. Она што ми помогнало е мојата храброст, искуство и верба во она што сакам да го постигнам.
Се сеќавате ли на емисиите што ги правевте на разгласната станица, и какви спомени имате од тојј период?
Гимназиските денови секогаш ми будат убави спомени, посебно моите активности на многу проекти и настани поврзани со гимназијата и локалните медиуми. Меѓу другите, соработував со професорот Тони Аврамов со кого водевме емисии на различни теми, имаше многу убава тимска и работна атмосфера, многу смеа и дружба што денес се ретки. Исто така патувавме заедно со играорната група при Пионерски дом од Гевгелија, правевме репортажи, и тоа се можам да кажам едни од најубавите и впечатливи моменти.
Порака до секои човек за успешен пат кон својата кариера.
Конзистентноста и дисциплината е клучот за да успеете. Мора постојано да бидеме добри и да даваме добар резултат. А тоа се постигнува со многу труд и работа, полно и постојано надградување. Уште и ако имате голема љубов кон тоа што го работиме , тоа е вистински благослов и нема сомнеж дека ќе успеете. Следете ги вашите соништа и работете на тоа да станат реалност!