Тијана Атанасова
Дојде Бадник. Еден од нашите најзначајни христијански празници кој носи дух на љубов, поврзаност и обнова. Празник, посветен на Христовото раѓање. Бадниковите традиции, како што се подготвувањето на бадниковата вечера и палежот на бадниковото огниште, носат светло значење и вредности кои се пренесуваат од колено на колено. Иако некои традиции се различни, тие носат важна порака – љубов, поврзаност, вера и разбирање во семејството.
Најзначајниот обичај за Бадник е месењето на бадниковото лепче, кое содржи паричка скриена внатре. Таа претставува надеж за благосостојба, здравје и среќа во годината која следи. Бадниковата вечера се состои од посни традиционални јадења како баклава, риби, сарма, грав, печена тиква, суво овошје и најчесто вино. Секое јадење има свој симбол: рибата како симбол на плодноста, гравот како симбол на животот, а сармата и сувото овошје носат благосостојба и изобилство. На средината на масата најчесто се става саксија со жито со црвена свеќа на средината, што го симболизира новиот живот што го носи Христовото раѓање.
Кај некои обичаи, под масата се става кокошка која се пече утредента на Божиќ и симболизира благосостојба и плодност во текот на годината која следува.
Пред вечерата, членовите на семејството излегуваат надвор пред вратата и го канат Господ да им дојде на гости и да им донесе здравје, среќа, успех, пари… Потоа се седнува на трпезата и најстариот член од семејството го крши лепчето. Првото парче му се дава на Господ, а остатокот се дели помеѓу членовите од семејсвтото, почнувајќи од најстариот па сè до најмладиот. Се верува дека кај тој што ќе се падне паричката, членовите треба да се ,,држат” за него во текот на годината. Важно е дека после вечерата, масата не се раскрева, бидејќи верувањето е дека Господ ќе дојде во текот на ноќта и ќе се послужи.
На трпезата не смее да се заборави и бадниковото гранче, кое симболизира нов живот, здравје и мир. Бадниковото гранче носи среќа и заштита во домот. Се верува дека било првото растение кое пораснало по раѓањето на Исус Христос.
Со секоја измината година, Бадник носи нови надежи и соништа, поттикнувајќи нè да бидеме подобри луѓе и да ги цениме оние што ги сакаме. Овој празник е вистински симбол на љубовта и верата, кои треба да ги негуваме не само на Бадник, туку и во текот на целата година.
Како што вели поговорката: ,,Кај и да си, за Бадник дома да си”.